25 Июль 2025
Недоступен ни однин перевод.
Дар заминаи иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон, ки дар ҷаласаи васеи Кумитаи Иҷроияи Марказии ҲХДТ рӯзи 17 июли соли 2025 дар шаҳри Душанбе баён гардид, бо ташаббуси Кумитаи иҷроияи Ҳизби Халқии Демократии Тоҷикистон дар шаҳри Хуҷанд ва Мақомоти иҷроияи ҳокимияти давлатии шаҳри Хуҷанд Аксияи ватандӯстона таҳти унвони "Парчам — рамзи Истиқлолият" роҳандозӣ гардид.
Нахуст аксияи мазкурро Раиси Кумитаи иҷроияи ҲХДТ дар шаҳри Хуҷанд Мунзифа Ҷабборӣ ва мудири шуъбаи ҷавонони Кумитаи иҷроияи ҲХДТ дар вилояти Суғд Парвиз Салоҳиддинов ҳусни оғоз бахшиданд.
Сипас, дар доираи ин иқдом, кормандони Кумитаи иҷроияи ҲХДТ дар шаҳри Хуҷанд ва аъзои фаъоли Ташкилоти ҷамъиятии ҷавонон “Созандагони Ватан” ба хонаи сокинони маҳаллаҳои “1-май” ва “Ҷаббор Расулов”-и шаҳри Хуҷанд ташриф оварда, бо ифтихору эҳсоси баланди ватандорӣ Парчами давлатии Ҷумҳурии Тоҷикистонро дар болои боми хонаҳои истиқоматии сокинон насб намуданд.
Таъкид шуд, ки ҳадафи асосии баргузории чунин аксия таҳкими ҳисси ифтихор аз давлату миллат, арҷгузорӣ ба арзишҳои миллӣ, баланд бардоштани рӯҳияи ватандӯстӣ ва бедор кардани масъулияти шаҳрвандӣ дар ҷомеа маҳсуб меёбад. Иштирокчиён дар рафти аксия бо мардум суҳбатҳо анҷом дода, дар бораи ҷойгоҳ ва муқаддасоти Парчами давлатӣ, аз ҷумла дар таҳкими ваҳдату суботи сиёсӣ, мавқеи он дар таърихи давлатдорӣ ва рисолати муҳими он ҳамчун нишони Истиқлол ва озодӣ маълумот доданд. Мардум бо рӯҳияи гарму самимӣ ин иқдоми ҳизбиро истиқбол гирифта, иброз доштанд, ки насби Парчами давлатӣ дар хонаи ҳар як шаҳрванди кишвар рамзи эҳтиром ба давлат ва Пешвои миллат буда, нишони масъулият ва муҳаббати беандоза ба Ватан мебошад. Чунин аксияҳо дар тамоми маҳаллаҳои шаҳр идома ёфта, то ҷашни 35 –солагии Истиқлоли давлатӣ боз ҳам вусъат дода мешаванд.
Дафтари матбуоти
Раиси шаҳри Хуҷанд
