23 Июл 2025
Баъди нашри маводи интиқодии Муродҷон Ҳалимович дар шабакаи иҷтимоии Фейсбук дар хусуси ба талаботи муҳити зист ҷавобгӯ набудани “Шаҳраки бачагона”-и паҳлуйи бонки давлатии “Амонатбонк” бо дастури Раиси шаҳри Хуҷанд Фирдавс Шарифзода аз ҷониби масъулини шуъбаи ҳифзи муҳити зист, КВДК Сарраёсати ободонӣ, коммуналӣ ва хоҷагию манзилии шаҳр, КВДК “Хизматрасонии нақлиёти санитарӣ”-и шаҳр дар ин мавзеъ тадбирҳои мушаххас андешида шуданд.
Маълум гардид, ки аз тарафи кормандони ободонӣ дар ин мавзеъ пайваста корҳои сабзкорӣ ва тозаву ороста нигоҳ доштани он амалӣ карда мешавад. Мутаассифона бархе шаҳрвандон, дақиқтараш тоҷироне, ки дар ин мавзеъ ба фурӯши маҳсулоти полезӣ ва мавсимӣ сарукор доранд, дидаву дониста партовҳои худро дар он ҷой мегузоранд, ки боиси ҷамъ шудани партови зиёд мегардад ва он ба муҳити зист таъсири манфии худро мерасонад.
Тоҷирон Музаффар Раҳимов ва Саид Алиев, ки дар ин мавзеъ ба фурӯши маҳсулоти полезӣ машғуланд, иқрор шуданд, ки ба ин амал даст заданд ва ваъда доданд, ки ин минбаъд амалашонро такрор нахоҳанд кард.
Ҳамин тавр, нисбати шаҳрвандон Музаффар Раҳимов ва Саид Алиев тибқи талаботи моддаи 232-и Кодекси ҳуқуқвайронкунии маъмурии Ҷумҳурии Тоҷикистон, яъне риоя накардани талаботи ҳифзи муҳити зист ҳангоми ҳамлу нақл, ҷойгиркунӣ, истифода, нест кардан (гӯронидан)-и партовҳои саноатию маишӣ ва дигар партовҳо маводҳо тартиб ва то 750 сомонӣ ҷаримабандӣ карда шуданд.
Шаҳрвандон аз кирдори худ сахт пушаймонӣ изҳор намуданд.
Аз ҷониби масъулини дахлдор партовҳои мавзеъ тоза ва лавҳаҳои “Партов партофтан манъ аст” насб карда шуд.
Бо истифода аз фурсат шуъбаи ҳифзи муҳити зисти шаҳри Хуҷанд аз сокинон ва меҳмонони шаҳри бостонии Хуҷанд эҳтиромона хоҳиш ва даъват ба амал меорад, ки маданияти баланди шаҳрвандиро риоя ва баҳри баланд бардоштани маърифати экологии сокинон ҳамчун нишонаи маданияти шаҳрнишинӣ, ободу зебо нигоҳ доштани атрофи минтақаҳои сайёҳгузар ва сабзазоркунӣ иқдомҳои ибратбахш намуда, дар сурати мушоҳида намудани чунин қонуншиканони муҳити зист ба масъулини дахлдор иттилоъ расонанд, то ин ки нисбаташон чораҳои фаҳмондадиҳӣ ва қонунӣ андешида шавад.
Мо дар якҷоягӣ шаҳрамонро ободу зебо менамоем!
Дафтари матбуоти
Раиси шаҳри Хуҷанд
