Маҳфил: Соҳибэҳтирому соҳибмақом

Дар оғоз муовини Раиси шаҳри Хуҷанд Муяссара Каҳҳорӣ аз номи Раиси шаҳри Хуҷанд Фирдавс Шарифзода фаъолияти нимасраи Абдуҷалил Исмоилов тавсиф намуда, иттилоъ дод, ки табиби ҳозиқ, духтури дараҷаи олӣ Абдуҷалил Исмоилов 2 майи соли 1950 дар ҷамоати деҳоти Ҳайдар Усмонови ноҳияи Бобоҷон Ғафуров дар оилаи коргар таваллуд шудааст. Пас аз хатми сарбаландонаи мактаби миёнаи №15-и шаҳри Хуҷанд ҳуҷҷатҳояшро бо дили пур ва орзуву ормонҳо ба Донишгоҳи давлатии тиббии Тоҷикистон ба номи Абўалӣ ибни Сино месупорад. Аз байни довталабони зиёд дар қатори беҳтаринҳо Абдуҷалил Исмоилов тавонист унвони донишҷўиро соҳиб гардад. Соли 1973 донишгоҳро бо ихтисоси духтур-педиатр бо сари баланд ба итимом расонд. Интернатураро дар беморхонаи бачагонаи вилоятии шаҳри Хуҷанд гузашт. Фаъолияти дармонбахширо ҳамчун духтури бачагона аз моҳи августи соли 1974 дар шўъбаи бачагонаи беморхонаи марказии ноҳияи Ҷаббор Расулов оғоз бахшид. Солҳои 1976-1977 дар беморхонаи ҷамоати деҳоти Ғўлакандози ин ноҳия дар шўъбаи бачагона рисолати касбии худро софдилона анҷом дод. Аз моҳи ноябри соли 1977 то соли 1994 мудири дармонгоҳи бачагонаи №2-и шаҳри Хуҷанд шуда, кор кард. Аз моҳи майи соли 1994 то соли 2008 мудири дармонгоҳи бачагонаи №1-и шаҳри Хуҷанд буд. Аз сентябри соли 2008 то 2009 муовини сардухтури маркази саломатии №3-и шаҳри Хуҷанд ва аз апрели ҳамон сол бошад, вазифаи сардухтури ин марказро то соли 2013 бар зимма дошт. Пас аз ба синни нафақа расидан аз фаъолияти дармонбахшӣ дур нашуд. Ҳоло бо дасту дили гарм, нерўву тавонмандӣ баҳри сиҳатии кўдакон заҳмат мекашад, то онҳоро ҳамеша саломату бардам дарёбад.

Хизматҳои шоистааш борҳо бо мукофоту ифтихорнома ва сипосномаҳои мақомоти давлативу соҳавӣ, аз ҷумла бо Ифтихорномаҳои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Раиси вилоят ва Раиси шаҳри Хуҷанд ба таври арзанда қадрдонӣ гардидааст. Духтури дараҷаи олӣ, Аълочии тандурустӣ ва ҳифзи иҷтимоии аҳолии Ҷумҳурии Тоҷикистон мебошад.

Дар идома ҳамоҳангсози муассисаҳои тандурустии шаҳри Хуҷанд Фирўз Комилов низ сухан карда, фаъолияти пурмаҳсули Абдуҷалил Исмиловро шоистаи пайравиву намунаи ибрат хонд. Иброз дошт, ки Абдуҷалил Исмоилов бо дониши амиқу фарох, таҷрибаи бисёрсола, қобилияту малака ва маҳорати баланд, бо дарки масъулияту масъулиятшиносӣ барои пешрафту рушди соҳаи тандурустӣ ҳамчун табиб, роҳбари пурдону соҳибтадбир саҳми арзандаи худро гузошта, ҳоло ҳам дар пешрди соҳа хизмати шоиста анҷом дода истодааст.

Ҳамчунин ҳамкасбону пайвандони Абдуҷалил Исмоилова низ ба сухан баромада, аз хислатҳои хамидаи табиб андешаҳои хешро баён доштанд.

Дар интиҳо Абдуҷалил Исмоилов ба Роҳбарияти Давлату Ҳукумат барои таваҷҷуҳу ғамхорӣ ба табибон ва ташкили имконоти ташхису бобат бо шароити шароити муосир изҳори миннатдорӣ намуда, таъкид дошт, ки дар оянда низ ҳамчун табиб барои салимии ҷомеа хизмати содиқонаву софдилона анҷом медиҳад ва саҳми худро минбаъд низ дар пешрафти соҳа шоиста мегузорад.