14 Феврал 2025
Имрӯз дар толори Мақомоти иҷроияи ҳокимияти давлатии шаҳри Хуҷанд таҳти раёсати Раиси шаҳри Хуҷанд Фирдавс Шарифзода бо иштироки муовини Раиси вилояти Суғд Ҷамшед Ҷӯразода, муовини аввали комисари ҳарбии вилоят полковник Исмоил Амирзода, муовини Раиси шаҳр, комиссари ҳарбии шаҳр, раисони маҳаллаҳо, кормандони комиссариати ҳарбӣ ва шахсони масъули шаҳрдорӣ ҷаласаи навбатии Ситод оид ба маъракаи даъвати баҳоронаи наваскарон ба хизмати ҳарбӣ баргузор гардид.
Нахуст, раиси Комиссияи даъвати наваскарон ба хизмати ҳарбӣ, муовини Раиси шаҳри Хуҷанд Ҷамшед Набизода доир ба омӯзиши пеш аз даъватӣ ва омода намудани шаҳрвандони солҳои таваллудашон 1998-2007 дар даъвати баҳории соли 2025 маълумот дод.
Иттилоъ дода шуд, ки таҳти сиёсати хирадмандонаи Асосгузори сулҳу ваҳдати миллӣ-Пешвои миллат, Президенти кишвар мўҳтарам Эмомалӣ Раҳмон Тоҷикистони соҳибистиқлоли мо дар марҳилаи рушд қарор гирифта, рўзгори мардум обод гашта, халқ шукри осмони софу мусаффо ва сулҳи бебозгашт карда, ба ояндаи дурахшон дилпурона назар меандозанд. Хизмат ба Ватан баробари хизмат ба модар аст.
Имрўз дар натиҷаи ғамхорию дастгириҳои пайвастаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои мусаллаҳ генерали артиш муҳтарам Эмомалӣ Раҳмон Қувваҳои Мусаллаҳи кишвар бо инфрасохтори замонавӣ, техникаву таҷҳизоти муосири ҳарбӣ ва кадрҳои соҳибихтисос таъмин мебошад.
Бо ҳидоятҳои Пешвои миллат ва саъю кўшишҳои назарраси Раиси вилояти Суғд Раҷаббой Аҳмадзода ба такмили фаъолияти қисмҳои низомии ҳудуди вилояту шаҳр, беҳтар гардонидани шароити зиндагии афсарону сарбозон таваҷҷуҳи бештар зоҳир карда мешавад.
Аз ҷониби Мақомоти иҷроияи ҳокимияти давлатии шаҳри Хуҷанд дар асоси Қарори Раиси вилояти Суғд 6-уми декабри соли 2024, Қарори раиси шаҳр аз 27-уми декабри соли 2024, ба тавсиб расида, ба сохторхои дахлдор дастрас гардидааст.
Тибқи қарори мазкур аз 2-юми январи соли 2025 дар ҳудуди шаҳри Хуҷанд аз ҷониби кормандони комиссариати ҳарбӣ ва раисони маҳаллаҳо корҳои омӯзишӣ ба роҳ монда шудааст. Ҳамчунин як қатор корҳои тарғиботию ташвиқотӣ роҳандозӣ гардидааст.
Сипас аз ҷониби Раиси шаҳри Хуҷанд Фирдавс Шарифзода ва муовини Раиси вилоят Ҷамшед Ҷӯразода фаъолияти комисияи даъвати ҳарбӣ мавриди таҳлил қарор гирифта, масъулини комиссариати ҳарбӣ, раисони маҳаллаҳова шахсони мутассаддӣ барои иҷрои босифати нақшаи пешбинигардида муваззаф гардиданд.
Таъкид шуд, ки хизмат ба Ватан ва ҳифзи оромиву осоиштагии сарзамини муқаддас қарзи шаҳрвандии ҳар ҷавонмарди ба ору номус ба ҳисоб рафта, Қувваҳои Мусаллаҳ сипари боэътимод ва такягоҳи давлату миллат арзёбӣ мегарданд. Маҳз бо шарофати ҷасорати касбӣ, садоқату ҷоннисорӣ ва хизматҳои афсарону сарбозон дар ҷомеаи мо сулҳу субот пойдор буда, мардум осоишта меҳнат ва зиндагонӣ мекунанд.
Мо бояд шукронаи сулҳу амонии кишварро кунем, зеро файзу баракат ва ҳаёти осуда аз сулҳу субот вобастааст. Қувваҳои Мусаллаҳ дар ҳар давру замон барои ҳар як мамлакати соҳибистиқлол пояи матин, кафили бехатарӣ ва таъминкунандаи ҳаёти осоиштаи мардуми он сарзамин ба ҳисоб меравад.
Дафтари матбуоти
Раиси шаҳри Хуҷанд
