04 Феврал 2025
Дар шаҳри Хуҷанд ҷиҳати амалӣ намудани ҳадафҳои чоруми стратегии мамлакат-саноатикунонии босуръати кишвар чораҳои амалӣ андешида шуда истодааст, ки имрӯз теъдоди корхонаҳои истеҳсоли хурду миёнаи шаҳр ба 306 адад расидааст, ки он дар соли 2024-ум ба миқдори он 39 адад зиёд шудааст.
Бояд қайд намуд, ки дар натиҷаи фаъолияти пурсамари корхонаҳои саноатии шаҳр давоми соли 2024 ба маблағи 2 миллиарду 30 млн. сомонӣ маҳсулот истеҳсол карда шуд.
Алҳол дар шаҳри Хуҷанд бунёди якчанд адад корхонаҳои нави саноатӣ бо фарогирии садҳо ҷойҳои нави корӣ босуръат идома дорад.
Раиси шаҳри Хуҷанд Фирдавс Шарифзода зимни як боздид аз раванди сохтмони ин корхонаҳо аз наздик шинос гардид.
Дар минтақаи саноатии шимолу шарқии шаҳри Хуҷанд сохтмони корхонаи нави ҶДММ «Дороинвест» бомаром идома дорад.
Иттилоъ дода шуд, ки корхонаи нави истеҳсолӣ бо мақсади саҳмгузорӣ дар татбиқи ҳадафи чоруми стратегӣ — саноатикунонии босуръати мамлакат сохта шуда, дар он коркарди меваву сабзавот ва банду басти он ба роҳ монда мешавад. Тавре мушоҳида гардид, корҳои асосии сохтмонӣ дар як бино ба итмом расида, дар ду бинои истеҳсолии дигар идома дорад. Тибқи нақша воридсозии дастгоҳу таҷҳизот аз Олмону Чин дар назар буда, бо мавриди истифода қарор гирифтани корхона даҳҳо нафар соҳиби ҷойи корӣ хоҳанд шуд.
Дар Минтақаи озоди иқтисодии “Суғд” аз ҷониби ширкати ватании “Афрангпласт” ҷараёни бунёди як корхонаи замонавии калон низ идома дорад, ки баъди истифодадиҳии он дар як сол беш аз 4000 тонна профилҳои пластикӣ истеҳсол карда мешавад. Ин ширкат дар ҳамкорӣ бо шарикони туркӣ маҳсулоти баландсифати профилҳои пласткӣ бо таҷҳисзоти муосир роҳандозӣ хоҳад намуд.
Дар ин минтақаи озоди иқтисодӣ ҳамчунин аз тарафи соҳибкорони маҳаллӣ ва ширкати “Тоҷпанел” бо сармоягузории беш аз 6 миллион сомонӣ дар масоҳати 0,73 га сохтмони корхонаи истеҳсоли панелҳои сохтмонӣ бомаром идома дорад ва он рӯзҳои таҷлили Наврӯзи байналмилал дар соли ҷорӣ ба истифода дода мешавад, ки он маҳсулоти истеҳсолшаванда воридивазкунанда мебошад.
Фирдавс Шарифзода дар маҳаллаи “Бофанда” бо рафти бунёди корхонаи истеҳсолии «Афзали Нур» шинос гардид.
Корхонаи мазкур дар асоси дастуру ҳидоятҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати тақвияти нерӯи истеҳсоливу содиротии мамлакат бунёд гардида, дар он истеҳсоли ҷӯроб ба роҳ монда мешавад.
Корхона аз ҷониби ширкати бисёрсоҳавии илмӣ-техникии «Нур» бунёд шуда, 100 адад таҷҳизоти истеҳсолӣ аз кишварҳои пешрафтаи ҷаҳон ворид карда шудааст. Дар корхона дар як моҳ то 600 ҳазор ҷуфт ҷӯроб истеҳсол гардида, ба бозори дохилӣ бароварда хоҳад шуд. Тибқи талабот як қисми маҳсулоти истеҳсолшаванда содирот мегардад.
Иттилоъ дода шуд, ки дар марҳилаи аввал 50 нафар занону духтарон бо ҷойи корӣ таъмин хоҳанд шуд.
Ҳамзамон аз ҷониби ширкат дар ин мавзеъ бо ташкили Парки инноватсионӣ, аз ҷумла корхонаву марказҳои хизматрасонӣ низ ба нақша гирифта шуда, дар назар аст, ки дар доираи омодагиҳо ба ҷашни Наврӯзи байналмилали 2025 ба истифода дода шавад.
Раиси шаҳри Хуҷанд ин иқдоми соҳибкори ватаниро намунаи ибрат унвон намуда, ҷиҳати суръатбахшии корҳо ва истифодаи самараноки имкониятҳои мавҷудаи Давлату Ҳукумат дастуру супоришҳо дод.
Дафтари матбуоти
Раиси шаҳри Хуҷанд
