29 Декабрь 2024
Недоступен ни однин перевод.
Имрӯз дар Муассисаи таълимии хусусии "Литсейи инноватсионии Ҷавонӣ" дар шаҳри Хуҷанд маросими қадршиносии ғолибони озмунҳои дохилимуассисавии "Луғатдони беҳтарин", "Ихтироъкорони ҷавон" ва "Ҷоми Литсей оид ба футбол" пуршукуҳ доир гардид.
Директори МТХ "Литсейи инноватсионии Ҷавонӣ дар шаҳри Хуҷанд" Сурайёхон Неъматзода зимни суханронӣ иброз дошт, ки ҳамешагӣ дар Паёми навбатии худ ба Маҷлиси Олии кишвар Асосгузори сулҳу ваҳдати миллӣ, Пешвои муаззами миллат, Ҷаноби Олӣ муҳтарам Эмомалӣ Раҳмон бобати аз худ намудани забонҳои хориҷӣ аз ҷумла русиву англисӣ таъкид намуда, баён медоранд, ки ки баҳри боз ҳам бештар аз худ намудани забонҳои хориҷӣ хонандагон бояд ҷаҳду талош намоянд ва дар ин замина ба роҳбарони муассисаҳои таълимӣ бобати забономӯзии хонандагон дастурҳои мушаххасу иловагӣ дода шуд. Ҷиҳати амалишавии дастуру ҳидоятҳои Пешвои муаззами миллат дар муассиса озмуни "Луғатдони беҳтарин" баргузор ва натиҷагирӣ карда шуда, 4 нафар хонандагони Литсей, ки беш аз 1400 адад луғатҳои русӣ-англисӣ аз ёд намудаанд, қадршиносӣ гардиданд. Хонандагони Литсей: Майнусов Қурбоналӣ, Олимов Мустафо, Сумайя Собитова ва Сафия Абдуллоева бо нишон додани маҳорати баланди луғатдонӣ ғолиби озмун гардиданд ва аз тарафи маъмурияти литсей бо туҳфаҳои арзишманд, аз ҷумла "Планшет" ва диплом ҳадя карда шуд.
Ҳамчунин баҳри ҳавасмандсозии хонандагони фаъол ба 50 нафар хонандагоне, ки беш аз 800 адад луғатҳои русиву англисӣ азёд намудаанд, Диплому туҳфаҳои арзишманд супорида шуд.
Баҳри амалисозии барномаи "Бистсолаи омӯзиш ва рушди фанҳои табиатшиносӣ, дақиқ ва риёзӣ" дар соҳаи илму маориф, солҳои 2020-2040" дар муассиса даҳаи охири моҳи декабр ҳафтаи "Инноватсия ва ихтироъкориву навоварӣ" баргузор карда шуда, дар доираи ин ҳафта озмуни "Ихтироъкорони ҷавон" ташкил ва баргузор карда шуд. Дар натиҷа 40 нафар хонандагон ғолибони озмуни мазкур гардида, бо тӯҳфаҳои хотиравӣ, медалҳои рамзӣ ва диплом қадршиносӣ карда шуданд.
Баҳри рушди варзиши футбол ва тарғиби тарзи ҳаёти солим байни хонандагони синфҳои 7-9 ба муносибати иқдоми ҷаҳонии Президенти Федератсияи Футболи мамлакат, Раиси шаҳри Душанбе муҳтарам Рустами Эмомалӣ оид ба "Рӯзи ҷаҳонии футбол" дар муассиса Ҷоми Литсей оид ба футбол баргузор карда шуда, дар натиҷа хонандагони синфи 9 “А” ғолиби мусобиқаи мазкур ва соҳиби Ҷом, медалҳои фахрӣ ва Ҷоизаи пулӣ дар ҳаҷми 500 сомонӣ гардиданд.
Дар доираи чорабинии мазкур ҳамзамон ғолибони олимпиадаҳои байналмилалӣ аз фанни математика ва ғолибони олимпиадаи фаннии шаҳрӣ низ қадршиносӣ карда шуданд.
Барномаи рангини фарҳангӣ, ки аз ҷониби хонандагони муассиса дар васфи "Ватан", "Модар", "Тоҷикистон" омода карда шуд ба чорабинӣ шукуҳу шаҳомати хос бахшид.
Таъкид шуд, ки роҳбарияти муассисаи таълимии хусусии "Литсейи инноватсионии Ҷавонӣ" дар шаҳри Хуҷанд дар соли 2025 тасмим гирифтааст, ки баҳри иҷрои нишондиҳандаҳо ва нуктаҳои муҳими Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» аз 28 декабри соли 2024 силсилаи озмуну мусобиқаҳоро роҳандозӣ ва беҳтаринҳоро бо маблағҳои пулӣ ва туҳфаҳои арзишнок қадршиносӣ хоҳад намуд.
Дафтари матбуоти
Раиси шаҳри Хуҷанд
