Конференсияи XXVIII ҳисоботӣ – интихоботии ҲХДТ дар шаҳри Хуҷанд баргузор ва роҳбарияти нави ҳизб дар шаҳр муаррифӣ гардид

Коференсияро раиси Кумитаи иҷроияи ҲХДТ дар шаҳри Хуҷанд Наим Маликисломӣ ифтитоҳ намуд ва ҳайати раёсати кории Конференсия, комиссияи мандатӣ, котибот, комиссияи таҳририяро барои тасдиқ пешниҳод кард ва он аз ҷониби вакилон якдилона қабул гардид.

Дар Конференсия ҳисоботи Кумитаи иҷроияи ҲХДТ дар шаҳри Хуҷанд оид ба ҷамъбасти натиҷаҳои фаъолият аз моҳи ноябри соли 2019 то моҳи июли соли 2022 ва вазифаҳо барои фаъолияти минбаъда, ҳисоботи комиссияи тафтишотии Кумитаи иҷроияи ҲХДТ дар шаҳри Хуҷанд оид ба ҷамъбасти натиҷаҳои фаъолияти молиявӣ аз моҳи ноябри соли 2019 то моҳи июли соли 2022 шунида шуда, масъалаи интихоби аъзои Кумитаи иҷроияи ҲХДТ дар шаҳри Хуҷанд, интихоби аъзои комиссияи тафтишотии ҲХДТ дар шаҳри Хуҷанд, интихоби сармуҳарири нашрияи «Шафақ»-и Кумитаи иҷроияи ҲХДТ дар шаҳри Хуҷанд ва интихоби вакилон ба Конференсияи 15-уми ҳисоботӣ – интихоботии ҲХДТ дар вилояти Суғд мавриди баррасӣ қарор дода шуд.

Раиси Кумитаи иҷроияи ҲХДТ дар шаҳри Хуҷанд Наим Маликисломӣ оид ба фаъолияти Кумитаи иҷроияи ҲХДТ дар шаҳри Хуҷанд аз моҳи ноябри соли 2019 то моҳи июли соли 2022 ва вазифаҳо барои фаъолияти минбаъда дар назди ҳозирин ҳисобот дода, афзуд, ки дар давраи ҳисоботӣ 17 ташкилотҳои ибтидоӣ таъсис дода шуда, он аз 232 ба 249 адад расонида шуд. Дар ин давра теъдоди афзоиши аъзои ҳизб 3 ҳазору 794 нафарро дарбар мегирад. Айни замон шумораи аъзои ҳизб дар шаҳри Хуҷанд 20 ҳазору 45 нафарро ташкил медиҳад, ки аз инҳо 12 ҳазору 674 нафар занон ва 8 ҳазору 601 нафар ҷавонон мебошанд. Аз шумораи умумии аъзои ҳизб 9 ҳазору 671 нафар дорои маълумоти олӣ, 4 ҳазору 913 нафар маълумоти олии нопурра, 3 ҳазору 152 нафар маълумоти миёнаи махсус, 2 ҳазору 309 нафар маълумоти миёна мебошанд. Боиси ифтихор аст, ки 744 нафар аъзоёни ҳизб соҳиби унвони илмӣ буда, 87 нафарро докторону профессорон, 657 нафарро номзадҳои илм ташкил медиҳанд.

Сипас, ҳисоботи комиссияи тафтишотии ҲХДТ дар шаҳри Хуҷанд раиси комиссияи тафтишотии кумиҷроияи шаҳрӣ Абдумавлон Азимов шунида шуд.

Ҳамчунин Аюб Усмонзода, ректори Муассисаи давлатии таълимии Донишгоҳи давлатии Хуҷанд ба номи академик Бобоҷон Ғафуров, раиси кумитаи иҷроияи ибтидоии «Бобоҷон Ғафуров», Садриддинов Манучеҳр Исломиддинович –директори филиали Донишгоҳи байналмилалии сайёҳӣ ва соҳибкории Тоҷикистон, раиси ташкилоти ибтидоии «Сайёҳи меҳанпараст», Тахмина Усмонова, директори Маркази назорати давлатии санитарию эпидемиологии вилояти Суғд ва дигарон баромад намуда, фаъолияти дунимсолаи КИ ҲХДТ дар шаҳри Хуҷандро қатоатбахш арзёбӣ карданд.

Зикр гардид, ки ҳизбиён дар тарғиби Паёми Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоқикистон муҳтарам Эмомалӣ Раҳмон пешгирии падидаҳои номатлуб, хизмати содиқона ба Ватан – модар, ҳимояи марзу буми кишвар, дар руҳияи меҳнатдӯстӣ ва меҳанпарастӣ ҳидоят намудани ҷавонон ва насли наврас ҳиссаи арзандаи хешро доранд.

Раиси Кумитаи иҷроияи ҲХДТ дар вилояти Суғд Зуфар Исмоилзода зимни суханронии хеш таъкид кард, ки ҲХДТ суботи сиёсии кишвар ва дастовардҳои замони соҳибистиқлолиро асоси иродаи озодии мардум ҳисобида, барои пойдории сулҳу ваҳдати миллӣ, рушду нумӯи иқтисодиёти давлат, пешрафту тараққиёт ва тарбияи қадрҳои ҷавон дар давлатдории миллӣ, илму маориф ва фарҳанг ҳамеша талош дорад. Инунин вазифаҳоро барои фаъолияти минбаъдаи КИ ҲХДТ дар шаҳри Хуҷанд ва аҳли аъзоёни ҳизб баён кард.

Фирдавс Шарифзода, Раиси шаҳри Хуҷанд, дар конфронс баромад намуда, қайд кард, ки фаъолияти кумиҷроияи шаҳрии ҳизб ба таври шаффоф дар сомонаҳои мақомоти иҷроияи ҳокимияти давлатии шаҳри Хуҷанд, Кумитаи иҷроияи ҲХДТ дар вилояти Суғд, кумиҷроияи шаҳрӣ ва дар нашрияи “Шафақ” мунтазам нашр мешаванд. Гузашта аз ин, мо аз иқдомҳои кумиҷроияи шаҳрӣ дар мавриди баргузории чандин конфронсу ҳамоишҳо сидқан дастгирӣ менамоем. Махсусан, баргузории конференсия марбут ба даҳсолаи оби тоза ва ҳадафҳои стратегии кишвар ҷомеаи моро ҳушдор дод, ки ба қадри дастовардҳои даврони соҳибистиқлолӣ расем.

Аммо бо вуҷуди фаъолияти самарабахши кумиҷроияи шаҳрӣ тавре аз маърӯзаи раиси кумиҷроия бар меояд, ҳанӯз кор дар самти ҷалби аъзо ва иштироки ҳизбиён дар чорабиниҳои ҳизбӣ дар соҳаҳои савдо, бонк, сохтмон, саноат тақвият мехоҳад.

Моро мебояд, ки ҷалби аъзоро аз ҳисоби ҷавонон бештар намуда, фаъолияти ташкилоти ҷамъиятии ҷавон “Созандагони Ватан”-ро тақвият бахшем. Онҳо бояд ба мактаби камолоти ҷавонон ва тарбияи кадрҳои арзандаи ҳизбӣ табдил дода шаванд. Зеро Ҳизби Халқии Демократии Тоҷикистон ҷавононро нерӯи созанда, боэътимод ва сармояи пойдори инсонӣ мешуморад ва ба онҳо такя мекунад.

Дар идомаи кори Конференсияи XXVIII ҳисоботӣ – интихоботии ҲХДТ дар шаҳри Хуҷанд ҳайати комиссияи тафтишотиро иборат аз 3 нафар ва вакилонро ба конференсияи вилоятӣ 68 нафар интихоб намуданд.

Дар масъалаи ҷорӣ ҳайати нави роҳбарияти ин ҳизб дар шаҳри Хуҷанд муаррифӣ гардид.

Ҳамин тавр, бо розигии Раиси ҲХДТ муҳтарам Эмомалӣ Раҳмон ба вазифаи раиси Кумитаи ҲХДТ дар шаҳри Хуҷанд Бахтиёр Исматҷонов пешниҳод ва аз ҷониби вакилони Конференсияи XXVIII интихоб ва тасдиқ гардид.

Наим Маликсломӣ, собиқ Раиси ҲХДТ дар шаҳри Хуҷанд баъди ҳисоботи 3 соли охир,бинобар ба кори дигар гузаштан, аз ин вазифа барканор гардид. Мавсуф дар ин маснад беш 11 сол фаъолияти пурсамар дошт.

Бояд қайд намуд, ки Бахтиёр Исматҷонов то ин дам дар вазифаи муовини Раиси Кумитаи ҲХДТ дар вилояти Суғд фаъолият дошт.

Дар охир дар вазъияти тантанавӣ якчанд нафар бо Сипосномаи Кумитаи Иҷроияи Марказии ҲХДТ, Кумитаи иҷроияи ҲХДТ дар вилояти Суғд ва шаҳри Хуҷанд қадршиносӣ гардиданд. Ҳамзамон ба 10 нафар аъзоҳои навинтихобгардида шаҳодатномаи ҳизбӣ супорида шуд.