Дар шаҳри Хуҷанд иҷлосияи панҷуми Маҷлиси вакилони халқи шаҳри Хуҷанд, даъвати шашум баргузор гардид
30 Декабр 2020
Субҳи имрўз дар толори Мақомоти иҷроияи ҳокимияти давлатии шаҳри Хуҷанд бо садо додани Суруди миллӣ иҷлосияи панҷуми Маҷлиси вакилони халқи шаҳри Хуҷанд, даъвати шашум бо иштироки иҷрокунандаи вазифаи Раиси шаҳри Хуҷанд Фирдавс Шарифзода, муовини Раиси вилояти Суғд Анвар Яъқубӣ ва вакилони шаҳрӣ оғоз гардид.
Вакили Маҷлиси вакилони халқи шаҳри Хуҷанд аз ҳавзаи интихоботии Сари баландӣ №20 Хайрулло Ғайбуллозода иҷлосияро ҳусни оғоз бахшида, ҳозиринро бо рўзномаи он шинос намуд.
Нахуст вакилони шаҳрӣ фармони Президенти Ҷумҳурии Тоҷикистон аз 18 ноябри соли 2020, № 73 “Дар бораи аз вазифаи раиси шаҳри Хуҷанди вилояти Суғд озод намудани Муҳаммадзода Маъруф”-ро тасдиқ намуданд.
Сипас ба самъи ҳозирин матни фармони Президенти Ҷумҳурии Тоҷикистон аз 18 ноябри соли 2020, № 74 “Дар бораи иҷрокунандаи вазифаи раиси шаҳри Хуҷанди вилояти Суғд таъин намудани Шарифзода Фирдавс” расонида шуд.
Фирдавс Шарифзода, иҷрокунандаи вазифаи раиси шаҳри Хуҷанд дар назди вакилони шаҳр баромад намуда, барои боварӣ ба Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ин вазифаи пурмасъулият арзи миннатдорӣ баён карда, аз ҷумла зикр дошт, ки тамоми қувваю васила ва донишу таҷрибаи хешро барои ободӣ ва рушди шаҳри бостонии Хуҷанд сарф намуда, барои Ватан, миллат ва сарзамини аҷдодӣ содиқона хизмат хоҳад кард.
Сипас ҳисобот оид ба фаъолияти мақомоти иҷроияи ҳокимияти давлатии шаҳр дар соли 2020 аз ҷониби муовини Раиси шаҳри Хуҷанд Аюб Раҳматзода ба самъи ҳозирин расонида шуд.
Сардори Раёсати молияи шаҳри Хуҷанд Абдусалом Бобоҷонзода дар бораи ворид намудани тағйиру иловаҳо ба қисми даромад ва хароҷоти буҷети шаҳр барои соли 2020 ва қабули буҷети шаҳри Хуҷанд барои соли 2021 баромади муфассал намуд ва вакилони шаҳрӣ ҳисоботи буҷети шаҳри Хуҷанд дар соли 2019-ро баъди баррасии он тасдиқ намуданд.
Аз ҷониби Фирўза Нуруллозода, муовини Раиси шаҳри Хуҷанд оид ба рафти иҷрои қарори Ҳукумати Ҷумҳурии Тоҷикистон аз 31 октябри соли 2009, № 600 “Дар бораи тасдиқи Барномаи тайёр намудани кадрҳои тиббӣ барои солҳои 2010-2020” дар шаҳри Хуҷанд маълумоти муфассал дода шуд.
Дар ҷараёни иҷлосия ҳисоботи комиссияи доимии Маҷлиси вакилони халқи шаҳри Хуҷанд оид ба масъалаҳои ҳифзи иҷтимоӣ, сиҳатии омма, ҳифзи табиат ва масоили оила ва занон ва ҳисоботи вакили Маҷлиси вакилони халқи шаҳри Хуҷанд аз ҳавзаи интихоботии “Маҳастӣ”, № 2 Дилафрўз Саидӣ оид ба рафти иҷрои ваколати вакилӣ ба самъи ҳозирин расонида шуд.
Сипас вакилон дар бораи пеш аз мўҳлат қатъ намудани ваколати вакилии вакили Маҷлиси вакилони халқи шаҳри Хуҷанд аз ҳавзаи интихоботии “Тиллокон”, №37 ва дар бораи таъин намудани интихобот ба ивази вакили хориҷшудаи Маҷлиси вакилони халқи шаҳри Хуҷанд, даъвати шашум қарор қабул намуда, ҷиҳати ташкили комиссияи шаҳрии интихобот ба ивази вакили хориҷшудаи Маҷлиси вакилони халқи шаҳри Хуҷанд, даъвати шашум масъулини дахлдор муваззаф гардиданд.
Сипас аз ҷониби вакилони масъалаҳои марбут ба номгузории объектҳои физикию ҷуғрофӣ ва муайян намудани нархи ибтидоии объекти иҷора мавриди баррасӣ қарор дода шуданд. Ҳамзамон “Барномаи рушди иҷтимоию иқтисодии шаҳри Хуҷанд барои солҳои 2021-2025” қабул гардид. Зимнан якчанд адад қарорҳои қарорҳои Раиси шаҳри Хуҷанд тасдиқ карда шуданд.
Анвар Яъқубӣ, муовини Раиси вилояти Суғд баромад намуда, доир ба масъалаҳои баррасишуда дар иҷлосия изҳори андешаронӣ намуд.
Фирдавс Шарифзода, иҷрокунандаи вазифаи Раиси шаҳри Хуҷанд дар анҷоми иҷлосияи панҷуми Маҷлиси вакилони халқи шаҳри Хуҷанд, даъвати шашум баромад намуда, аз вакилони шаҳрӣ даъват ба амал оварда, аз ҷумла зикр дошт, ки дар фаъолияти ҳаррўзаи худ ҳамчун намояндагони халқ ба масъалаҳои асосии рушди иҷтимоию иқтисодии шаҳр, баланд бардоштани сатҳи некўаҳволии мардум таваҷҷўҳи бештар зоҳир намоянд ва бо ин васила ҳамкориро бо намояндагони мақомоти иҷроияи ҳокимияти давлатии шаҳр густариш диҳанд.
Фирдавс Шарифзода ҳамзамон ҷиҳати роҳандозӣ намудани тадбирҳои зарурӣ бо мақсади бо дастовардҳои назаррас истиқбол гирифтани ҷашни 30-солагии Истиқлолияти давлатии Ҷумҳурии Тоҷикистон, таъмини иҷрои нишондиҳандаҳои асосии Дурнамои рушди иҷтимоию иқтисодии шаҳр барои солҳои 2020-2022 ва иҷрои нақшаҳои пешбинишуда вобаста ба корҳои бунёдкориву созандагӣ, андешидани чораҳои мушаххас доир ба таъмини нақшаҳои буҷети давлатӣ ва маҳаллӣ, кам кардани бақияи қарзи андоз ва суғуртаи иҷтимоии давлатӣ, сари вақт пардохтани нафақа, зиёд кардани шумораи кормандони маошгири соҳаҳои иқтисодиёт тавассути муайян ва ба ҳисоботи оморӣ ворид кардани шуғли ғайрирасмӣ, инчунин ташкили ҷойҳои нави кории мутобиқ ба стандартҳои байналмилалӣ, корбарӣ дар самти ҷалби сарчашмаҳои бо андозбандӣ фарогирифтанашуда ва истифодаи шароити мавҷуда, ҷиҳати таъмини иҷрои саривақтии нишондиҳандаҳои ҳармоҳаи буҷет, инчунин пешгирии истифодаи ғайримақсади маблағҳои буҷетӣ, андешидани чораҳои амалӣ ҷиҳати идома додани фаъолият дар самти азнавсозии кўчаву хиёбон, сохтмони маҷмааи фаввораҳо дар ҷойҳои истироҳати мардум, таъмиру тармими роҳравҳо, тоза намудани соҳили дарё, каналу ҷўйборҳо, чароғонкунии кўчаҳо, гузоштани қуттиҳои партовҷамъкунӣ дар нуқтаҳои муқарраршуда ва шинондани гулу буттаҳои дарахтони ҳамешасабз дар қадди роҳҳо ва боғҳои фарҳангию фароғатӣ, корбарӣ ҷиҳати тайёр намудани ниҳолҳо, кўчату қаламчаҳои гулҳо баҳри сари вақт оғоз намудани маъракаи ниҳолшинонию кабудизоркунӣ дар ҳамбастагӣ бо аҳолӣ ва бо ин васила тибқи меъёр ва қоидаҳои агротехникӣ ташкил намудани маъракаи имсола ва дигар масоили рӯзмарра масъулини дахлдорро вазифагузорӣ намуд.
Бо садо додани Суруди миллии Ҷумҳурии Тоҷикистон ба кори иҷлосияи панҷуми Маҷлиси вакилони халқи шаҳри Хуҷанд, даъвати шашум ҳусни анҷом бахшида шуд.
Дафтари матбуоти
Раиси шаҳри Хуҷанд
