21 Сентябр 2020
Дар толори Мақомоти иҷроияи ҳокимияти давлатии шаҳри Хуҷанд бо иштироки ҷавонони ихтиёрӣ, волидайни ҷавонони ба хизмати ҳарбӣ сафарбаршуда, кормандони комиссариати ҳарбӣ ва раисони кумитаи маҳаллаҳо чорабинӣ баргузор гардид.
Раиси шаҳри Хуҷанд Маъруф Муҳаммаддзода дар оғози мулоқот ба волидайни сарбозон ва сержантон, ки фарзандонашонро дар рўҳияи ватандўстӣ парвариш намудаанд, арзи миннатдорӣ баён карда, аз ҷумла афзуд, ки фарзандони онҳо имрўз бо хоҳиши худ ба сафи Қувваҳои Мусаллаҳи Ҷумҳурии Тоҷикистон номнавис гардида, баҳри ҳифзи марзу буми Ватани азизамон Тоҷикистони соҳибистиқлол хизмат намуда, қарзи шаҳрвандии худро адо намуда истодаанд, бо сари баланд хизмати Ватан-модарро сарбаландона адо намуда, ба назди аҳли оилаи худ бармегарданд ва баҳри ободонӣ ва шукуфоии кишвари азизамон саҳми босазои худро мегузоранд.
Маъруф Муҳаммадзода гуфт, ки боиси хушбахтии мо аст, ки имрўз Тоҷикистони азизу маҳбубамон дар арсаи ҷаҳонӣ шуҳратманд гардида дар фазои он кабўтарони сулҳ парвоз доранд, кўдакон хурсандии кўдакона доранд, пирони рўзгордида давлати пирӣ меронанд, ҷавонони саодатманд дар пешрафти Ватани дилоро саҳми хешро мегузоранд, ки ин ҳама бо шарофати заҳматҳои шабонарўзии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва халқи меҳнатқарин ва шикастнопазири тоҷик мебошад. Ба ҳамин хотир қадру қиммати сулҳ, Ваҳдати миллӣ хеле гарон аст ва ҳар як нафар фарзанди воқеии Ватан барои ҳифз ва ба наслҳои оянда мерос гузоштани ин арзишҳои муқаддас бояд кўшиш намояд.
Таъкид шуд, ки ҳамасола тибқи Фармони Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи кишвар муҳтарам Эмомалӣ Раҳмон дар кишварамон маъракаи даъвати ҷавонон ба хизмати ҳарбӣ ба роҳ монда шуда, аз шаҳри Хуҷанд низ ҳамасола садҳо нафар ҷавонони шуҷои Ватан баҳри ҳифзи марзу буми Ватанамон сафарбар карда мешаванд.
Тавре Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баён намудаанд; “Хизмат кардан ба Ватан вазифаи муқаддас ва шарафи бузурги ҳар як фарзанди бонангу номуси мамлакат аст”. Бо қаноатмандӣ изҳори назар кард, ки сол аз сол сафи ҷавонони ихтиёрӣ барои адо намудани қарзи шаҳрвандии хеш бисёр гашта истода, намунаи ибрат ба баъзе аз ҷавононе, ки имрўз аз хизмати Ватан саркашӣ менамоянд, ҳастанд.
Боиси хушнудист, ки бо дастгирии Ҳукумати Ҷумҳурии Тоҷикистон такмили фаъолияти қисмҳои низомии ҳудуди мамлакат ва беҳтар гардонидани шароити зиндагии афсарону сарбозон солҳои охир дар сатҳи баланд ба роҳ монда шуда, имрўз Қувваҳои Мусаллаҳи Ҷумҳурии Тоҷикистон соҳиби инфрасохтори замонавӣ, техникаву таҷҳизоти муосири ҳарбӣ ва кадрҳои миллии афсарии дорои тахассуси олӣ мебошанд.
Раиси шаҳри Хуҷанд Маъруф Муҳаммадзода гуфт, ки аз шароити хуби қисмҳои низомии кишвар худи волидайни сарбозон ва сержантон ба таври пурра огаҳӣ доранд. Зеро ҳамасола бо дастгирии Мақомоти иҷроияи ҳокимияти давлатии шаҳру вилоят волидайн ва хешу ақрабои наваскарон ба дидори фарзандони хеш сафарбар карда шуда, худ шоҳиди шароити хуби қисмҳои ҳарбӣ гашта истодаанд. Имрўз ягон муаммо вобаста ба вазъи хизмати ҳарбӣ дар қисмҳои низомӣ мавҷуд нест. Фақат ҷавонони мо бо амру дили пок бояд қарзи шаҳрвандии худро дар назди Ватан адо намоянд.
Бо шарофати сиёсати хирадмандона ва оқилонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мудҳиштарин рўзҳое, ки ба сари тоҷикон омада буд, Артиши миллӣ таъсис дода шуда, ҳамчун наҷотбахшу меъмори бахту саодат дар хонадони ҳар сокини кишварамон хуршеди нурфишони меҳру муҳаббат ва сулҳу сафоро дурахшон намуд.
Бо шарофати далериву шуҷоат ва фидокориву ҷоннисориҳои хизматчиёни ҳарбӣ - фарзандони бонангу номуси Ватан, дар кишвари азизамон ҳокимияти қонунӣ барқарор гардида, барои сулҳу суботи устувор заминаи мустаҳкам фароҳам оварда шуд.
Давлату Ҳукумат фидокориву ҷонбозиҳои афсарону сарбозони шуҷои Ватанро ҳаргиз фаромўш намекунанд ва хотираи неки ҷавонмардонеро, ки барои барқарор намудани сохти конститутсионӣ, пойдории сулҳу субот, ҳимояи марзу буми Ватан ва ҳифзи зиндагии орому осоиштаи сокинони мамлакат ҷони худро нисор кардаанд, ҳамеша пос медорад.
Мо бояд ҳамеша зираку ҳушёр бошем ва ҳаргиз фаромӯш насозем, ки фазои орому осудаи имрўзаи мамлакат бар ивази ҷони ҳазорон нафар ҷавонмардони бонангу номуси миллат ба даст омадааст.
Ҳоло барои он, ки ин давлат, ин марзу бум ва ин сарзамини муқаддаси воқеан биҳиштосо насиби ҷовидонии миллати куҳанбунёди тоҷик бошад, мову шумо ва насли ҷавони имрўза бояд бо эҳсоси гарми ифтихор аз давлати соҳибихтиёри худ, онро самимона дўст дорем, бо таъмини волоияти қонун, таҳкими ваҳдати миллӣ ва худшиносиву худогоҳӣ ҳар зарраи хоки он ва ҳар ваҷаб замини онро чун гавҳараки чашм ҳимоя карда, ба хотири ободиву шукуфоияш талош намоем.
Аз ин рў, ҳар як ҷавони бонангу номуси Ватан ўҳдадор аст, ки бо масъулияти фарзандӣ ва садоқату эътиқод ба халқи хеш баҳри ҳифзи марзу буми кишвар омода гашта, қарзи шаҳрвандии худро адо намояд.
Иттилоъ дода шуд, ки дар ин толор, як қатор ҷавонони шаҳри Хуҷанд ҳозир омадаанд, ки бо хоҳиши худ мехоҳанд ба сафи Қувваҳои Мусаллаҳи Ҷумҳурии Тоҷикистон номнавис гардида, қарзи шаҳрвандии худро дар назди Ватан адо намоянд.
Дар анҷоми мулоқот шаҳрдор аз волидайни сарбозони ихтиёрӣ сафарбаршуда хоҳиш намуд, ки барои даъват намудани ҷавононе, ки имрўз бо ҳар восита аз хизмати ҳарбӣ саркашӣ менамоянд, корбарӣ намуда, онҳоро баҳри адо намудани қарзи шаҳрвандии хеш ҷалб намоянд.
Сипас ба як қатор волидайни сарбозон мактуби миннатдории Вазири мудофиаи Ҷумҳурии Тоҷикистон генерал полковник Шералӣ Мирзо тақдим карда шуд.
Дар анҷоми мулоқот аз ҷониби Раиси шаҳри Хуҷанд Маъруф Муҳаммадзода ҷиҳати босифат гузаронидани маъракаи даъвати тирамоҳии ҷавонон ба хизматӣ ҳарбӣ ба масъулини дахлдор дастуру супоришҳои мушаххас дода шуд.
Дафтари матбуоти
Раиси шаҳри Хуҷанд
