15 Август 2019
Дар толори Мақомоти иҷроияи ҳокимияти давлатии шаҳри Хуҷанд бо иштироки Раиси шаҳри Хуҷанд Маъруф Муҳаммадзода табибони муассисаҳои тандурустии шаҳр маҷлиси тантанавӣ бахшида ба Рўзи кормандони соҳаи тиб баргузор гардид.
Шаҳрдори Хуҷанд Маъруф Муҳаммадзода табибон ва дигар кормандони соҳаи тандурустии шаҳрро бо Иди касбишон табрику таҳният гуфта, аз ҷумла зикр дошт, ки дар сатҳи баланди маънавию фарҳангӣ таҷлил кардани Иди касбии кормандони соҳаи тиб, воқеан ба зодрўзи асосгузори тибби ҷаҳон, нобиғаи оламшумул, олим, файласуф, донишманд, классики адабиёти тоҷику форс ва энсиклопедисти беҳамто Абўалӣ ибни Сино рост меояд. Соҳаи тандурустӣ ва умуман, ҳифзи сиҳатии омма, таҳти таваҷҷўҳи ҳамешагии роҳбарияти мамлакат ва мақомоти иҷроияи ҳокимияти давлатӣ қарор дорад.
Тавре Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар баромадҳояшон таъкид доштанд: «Ҳукумати мамлакат тамоми чораҳоро андешида истодааст, ки рушди соҳаи тандурустӣ таъмин карда шавад ва сокинони мамлакат ба хизматрасонии босифат ва муосири тиббӣ дастрасӣ дошта бошанд».
Ин аст, ки дар ҳамаи муассисаҳои тиббии шаҳри Хуҷанд бо дастгирии бевоситаи Раиси вилояти Суғд Раҷаббой Аҳмадзода муҷаҳҳазгардонии таҷҳизоти муосири техникии тиббӣ бештар гашта, марҳила ба марҳила аз таъмиру таҷдид бароварда шуда истодаанд.
Таъкид гардид, ки Ҳукумати мамлакат дар сиёсати иҷтимоии худ навсозиҳоро дар соҳаи тандурустӣ самти афзалиятнок арзёбӣ намуда, маблағгузориро ба ин соҳаи ҳаётан муҳим сол аз сол афзоиш дода, шароити инфрасохтори соҳаро ба талаботи замон мутобиқ гардонида истодааст. Айни ҳол тавассути амалӣ гардонидани тадбирҳои зарурӣ дастрасии кўмакҳои аввалияи тиббию санитарӣ ба аҳолии кишвар тавсеа ёфта, бунёди иншооти муосири тиббӣ ва таъмин намудани онҳо бо технологияҳои навтарини ташхису табобат бомаром идома дорад.
Маъруф Муҳаммадзода гуфт, ки тибқи нақшаи чорабиниҳои шаҳрӣ оид ба корҳои ободонию бунёдкорӣ ба муносибати 30-солагии Истиқлолияти давлатии Ҷумҳурии Тоxикистон дар соҳаи тандурустӣ дар маҷмўъ сохтмон ва таъмиру азнавсозии 10 адад муассисаҳои тандурустӣ ва марказҳои табобатию ташхисӣ ба нақша гирифта шуда, қисме аз онҳо аллакай ба истифода дода шуданд. Аз ҷумла, таҷдид ва азнавсозии бинои нави стансияи ёрии таъҷилӣ дар соҳили рости шаҳри Хуҷанд, ки санаи 31 июли соли 2019 бевосита бо иштироки Вазири тандурустӣ ва ҳифзи иҷтимоии аҳолии Ҷумҳурии Тоҷикистон Насим Олимзода ва Раиси вилояти Суғд Раҷаббой Аҳмадзода мавриди баҳрабардорӣ қарор дода шуд. Баистифодадиҳии стансияи ёрии таъҷилии тиббии шаҳри Хуҷанд ҷиҳати дар сатҳи баланд ба роҳ мондани хизматрасонии аввалияи тиббӣ барои беш аз 120 ҳазор аҳолии соҳили рости шаҳри Хуҷанд заминаи мусоид фароҳам овард. Иттилоъ дода шуд, ки дар маҷмўъ дар шаҳр 16 муассисаҳои тиббӣ фаъолият доранд, ки бо тамоми таҷҳизотҳои муосири тиббӣ ва кадрҳои баландихтисос таъмин мебошанд.
Раиси шаҳри Хуҷанд Маъруф Муҳаммадзода дар анҷоми суханронии худ изҳори умедворӣ намуд, ки кормандони соҳаи тандурустии шаҳр барои баланд бардоштани дараҷаи хизматрасонии тиббӣ ва ба ҳаёт татбиқ кардани тарзу усулҳои нав ба нави муолиҷа, мустаҳкам гардондани саломатии халқ, пешгирии интишори бемориҳо кўшиши бештар ба харҷ медиҳанд ва ҷашни 30-солагии Истиқлолияти давлатии Ҷумҳурии Тоҷикистонро бо дастовардҳои назаррас пешвоз мегиранд.
Сипас аз ҷониби Раиси шаҳри Хуҷанд Маъруф Муҳаммадзода ба як қатор кормандони пешсафи соҳаи тандурустии шаҳр Сипоснома ва туҳфаҳои хотиравӣ тақдим карда шуд.
Дафтари матбуоти
Раиси шаҳри Хуҷанд
