11 Август 2019
Ҳамшаҳриёни азиз!
Фарорасии Иди саиди Қурбонро аз номи Мақомоти иҷроияи ҳокимияти давлатии шаҳри Хуҷанд ба ҳамаи Шумо ҳамдиёрони арҷманд муборакбод намуда, ба хонадонатон осоишу ободӣ, саодати рўзгор, имону ибодати комил ва тани сиҳату хотири ҷамъ орзу менамоям.
Боиси сарфарозист, ки мардуми Хуҷанди бостонӣ мисли дигар шаҳру навоҳии кишвар Иди саиди Қурбонро, ки аз беҳтарин арзишҳои инсонпарварию мардумнавозӣ саршор аст, дар фазои суботи сиёсӣ, пойдорӣ ва устувории ваҳдати миллӣ, саъйю талошҳои созанда ва бунёдкорона барои расидан ба зиндагии шоиста ва эъмори ҷомеаи демократӣ, ҳуқуқбунёд ва дунявӣ истиқбол гирифта истодаанд.
Зеро бо шарофати Истиқлолияти давлатии кишварамон таҳти сарварии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон миллати мо дар озодии виҷдон, дину ақида, адои маросимҳои суннатию динӣ соҳиби имкониятҳои фаровон гардида, дини мубини ислом ҳамчун дини поку беолоиш ва раҳнамои накўкориҳо дар кишвари мо мақоми мустаҳкамро соҳиб гашт.
Аз ин ҷост, ки Пешвои муаззами миллат дар аксари мулоқотҳои худ таъкид мекунанд, ки дар шароити давлати озоди демократӣ ва дунявӣ имрўз имкон дорем, ки таълимоти созандаи дини мубини исломро, бахусус, доир ба тарғиби дўстиву муҳаббат ва кўмаку дастгирии байниҳамдигарӣ дар байни тамоми афроди ҷомеа густариш диҳем.
Воқеан ҳам, хайрхоҳу дастгирии бенавоёну бечорагон будан беҳтарин хислатҳои некўи инсони буда, ҳамин фазилат ифодагари асли моҳияти Иди Қурбон мебошад, ки ба шарофати он дастархони оилаҳои камбизоату ниёзманд ҳам ғанӣ мегардад, инсонҳои соҳибдилу ғамхор сари ятимонро сила мекунанд, ба аёдати пирону барҷомондагон ва одамони яккаву танҳо мераванд, меҳру муҳаббати ҳамагон афзоиш меёбад.
Дар иртибот ба ин, аз ҷониби мақомоти иҷроияи ҳокимияти давлатии шаҳри Хуҷанд ва соҳибкорону шахсони саховатманд дар арафаи ин иди суннатӣ садҳо ҳамдиёрони арҷмандамон дар радифи маъюбону дармондагон, собиқадорони ҷангу меҳнат ва кўдакони ятиму бепарастор бо маводҳои хўрокаву кўмакҳои моддӣ мавриди аёдат қарор гирифта шуданд.
Ҳамзамон бояд хотирнишон созам, ки имрўз даҳҳо нафар аз ҳамшаҳриёни мо дар шаҳри Маккаи мукаррама қарор дошта, зиёрати хонаи Худо мекунанд. Аз ин рў, орзу мекунем, ки ҳаҷашон қабул гардаду, ба ниятҳои некашон расанд ва сиҳату саломат ба Хуҷанди бостонӣ баргарданд.
Бо итминони комил метавон гуфт, ки намозу ибодати аҳли диёр чун ворисон ва пайравони мазҳаби фарзанди фарзонаи миллат Абўҳанифа Имоми Аъзам ҳамешагӣ намози шукронаву садоқат ба Ватан ва саодати ҷомеа хоҳад буд. Зеро танҳо бо орзуи хушбахтии халқ ва хизмати содиқона ба нафъи ҷамъият ҳар фард метавонад бар маснади бузургиву шукўҳ, хонаободӣ ва муҳаббати илоҳӣ мушарраф гардад.
Чунон, ки аз таърихи дини мубини ислом бармеояд ҳар кадоми мо имрўз сабру таҳаммулро бояд пеша карда, ба фардои зиндагӣ некбинона назар намоем. Кинаву адоватро аз дилҳо берун намоем ва пайваста дар хотир дошта бошем, ки мо ҳама аҳли як ватан, зодаву парвардаи як хок, яъне Тоҷикистони азиз ҳастем.
Тавре маълум аст, ҳамаи мо дар арафаи ҷашни пуршукўҳи 28-солагии Истиқлолияти давлатии Ҷумҳурии Тоҷикистон қарор дорем. Бояд хотирнишон созем, ки соли ҷорӣ Ҷумҳурии Тоҷикистон ҷашни 28-солагии Истиқлолияти худро дар шароити идома доштани равандҳои пурталотуми ҷаҳонишавӣ ва ҷаҳони пур аз таззодҳо таҷлил менамояд.
Аз ин рў барои эмин мондан аз таъсири омилҳои манфии раванди фарогири ҷаҳонишавӣ аҳли ҷомеа бояд тафаккури солими миллиро дар зеҳни ҷавонон инкишоф диҳанд, арзишҳои миллиро аз таҳдидҳои хатарбори асри навин ҳифз намоянд ва ваҳдати миллиро таҳким бахшанд.
Бино ба таъкиди Пешвои муаззами миллат Истиқлолият ва Ваҳдат ду мафҳуми муқаддасу бо ҳамдигар пайванд буда, ҳифзи истиқлолияти давлатӣ, сулҳу оромӣ ва дигар арзишҳои миллӣ вазифаи муқаддаси ҳар як фарди бонангу номуси миллат мебошад.
Ҳамзамон соли ҷорӣ мардуми сарбаланди тоҷик Иди фархундаи Истиқлолияти давлатиро дар рўзҳое таҷлил намуда истодаанд, ки дар сар то сари кишвари азизамон корҳои ободонию созандагӣ ба истиқболи ҷашни бошукўҳи 30-солагии Истиқлолияти давлатии Ҷумҳурии Тоҷикистон вусъати тоза гирифтааст.
Дар асоси нақшаи чорабиниҳои шаҳрӣ оид ба корҳои ободонию бунёдкорӣ ба муносибати 30-солагии Истиқлолияти давлатии Ҷумҳурии Тоҷикистон ва ба ин муносибат аз тарафи раиси вилояти Суғд, муҳтарам Раҷаббой Аҳмадзода эълон гардидани 1300-рўзи ободониву бунёдкорӣ, дар шаҳри Хуҷанд сохтмони зиёда аз 500 адад иншооти таъиноти гуногун пешбинӣ шудааст.
Боиси ифтихору сарбаландист, ки дар заминаи нақшаи чорабинии мазкур чун дар тамоми гўшаву канори кишвари азизамон – Тоҷикистони соҳибистиқлол, бо дастгирӣ ва ғамхориҳои пайвастаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Раиси вилояти Суғд, муҳтарам Раҷаббой Аҳмадзода дар шаҳри Хуҷанд низ аллакай садҳо адад иншоотҳои гуногуни иҷтимоию маишӣ ва истеҳсолию саноатӣ сохта ба истифода дода шуданд, ки барои баланд бардоштани сатҳи некўаҳволии мардум заминаи воқеӣ гузошта, ба ҳусну таровати шаҳр шукўҳу шаҳомати хосае зам намуданд.
Дар маҷмўъ дар нимсолаи аввали соли 2019 дар доираи нақшаи чорабиниҳои шаҳрӣ бахшида ба ҷашни 30-солагии Истиқлолияти давлатии Ҷумҳурии Тоҷикистон дар ҳудуди шаҳри Хуҷанд зиёда аз 133 иншооти гуногуни иҷтимоию маишӣ ва савдою хизматрасонӣ сохта ба истифода дода шуда, дар арафаи ҷашни 28-умин солгарди Истиқлолияти давлатии Ҷумҳурии Тоҷикистон ифтитоҳи боз даҳҳо адад иншоотҳои гуногуни иҷтимоию истеҳсолӣ ба нақша гирифта шудааст.
Боварии комил дорам, ки минбаъд низ мардуми сарбаланди Хуҷанди бостонӣ пуштибонии худро аз сиёсати пешгирифтаи Пешвои муаззами миллат, муҳтарам Эмомалӣ Раҳмон ва роҳнамоиҳои Раиси вилояти Суғд, муҳтарам Раҷаббой Аҳмадзода идома бахшида, баҳри боз ҳам ободу зебо гардидонидани шаҳри азизамон саҳми босазои худро хоҳанд гузошт.
Бо таманнои амалишавии ин нияту орзуҳои нек, бори дигар, Шумо ҳамшаҳриёни азизро бо фарорасии Иди мубораки Қурбон табрик намуда, бароятон хушҳолии рўзгор, дастархони пур аз нозу неъмат, барори кору комёбиҳои беназир, сулҳу ваҳдат ва файзу баракати бепоёнро таманно менамоям.
Идатон муборак бод, ҳамдиёрони азиз!
Дафтари матбуоти
Раиси шаҳри Хуҷанд
