10 Июн 2019
Дар муассисаи давлатии Боғи фарҳангӣ-фароғатии Хоҷа Камоли Хуҷандӣ маросими кушодашавии фестивали оммавӣ-варзишии ҷумҳуриявӣ оид ба намуди шоҳмот барои дарёфти Ҷоми Пешвои миллат бо иштироки беш аз 600 нафар дӯстдорони ин намуди варзиш баргузор гардид.
Чорабиниро муовини Раиси вилояти Суғд Баҳоваддин Баҳодурзода оғоз намуда, аз ҷумла зикр дошт, ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ҳар як мулоқоту вохӯрӣ бо зиёиён ва аҳолии кишвар дар масъалаи ҷавонон ва бахусус рушди навъҳои гуногуни варзиш алоҳида сухан гуфта, аз муассисаҳои дахлдор даъват менамоянд, ки ба масъалаи илмомӯзӣ, касбомӯзӣ ва шуғл варзидани ҷавонон ба варзиш диққати ҷиддӣ диҳанд. Зеро ҷавонони бетаҷрибаву ноогоҳро ҳамагуна қувваҳои ифротӣ метавонанд ба худ моил сохта, онҳоро барои амалӣ намудани ҳадафҳои ғаразноки сиёсии худ истифода баранд. Қайд кардан лозим аст, ки ҳамасола дар сатҳи баланди ҷамъиятиву сиёсӣ таҷлил гардидани Рӯзи ҷавонон шаҳодати ғамхориҳои пайвастаи давлату Ҳукумат нисбат ба насли ҷавони кишвар мебошад. Ҳар тадбире, ки дар мамлакат амалӣ карда мешавад, пеш аз ҳама, барои беҳбудии ҳаёти ҷавонон ва ояндаи неки Тоҷикистон нигаронида шудааст.
Сипас, Ҷамшед Абдуқаюмзода, муовини Раиси шаҳри Хуҷанд суханронӣ намуда, таъкид дошт, ки ҳамасола дар шаҳри Хуҷанд ҷиҳати рушди тарбияи ҷисмонӣ ва варзиш, ҷалби васеи омма ба намудҳои мухталифи варзиш тадбирҳои мушаххас андешида мешаванд. Дастовардҳои варзишгарони шаҳри Хуҷанд дар мусобиқаҳои сатҳи ҷаҳонӣ, байналмилаливу ҷумҳуриявӣ, вилоятӣ ва шаҳрӣ назаррас мебошад.
Ҷоиз ба зикр аст, ки бо мақсади ҷалби бештари аҳолӣ, хусусан наврасону ҷавонон ба варзиш дар ҳудуди шаҳри Хуҷанд беш аз 300 иншооти варзишӣ мавриди истифодабарӣ қарор дорад. То ин давра зиёда аз 20 адад иншоотҳои варзишӣ ба истифода дода шуда, бунёд ва азнавсозии толорҳо ва майдончаҳои варзишӣ аз ҷониби мақомоти давлатию ҷамъиятӣ ва соҳибкорони маҳаллӣ дар доираи эълон гардидани “1300 Рўзи ободонию созандагӣ бахшида ба ҷашни 30-солагии Истиқлолияти давлатии Ҷумҳурии Тоҷикистон” бомаром идома дорад.
Зикр гардид, ки идома додани иқдомҳо дар самти бунёди иншоотҳои варзишию маърифатӣ, ба вуҷуд овардани ҷойҳои нави корӣ низ аҳамияти бузург дорад, зеро ҷавононро бо шуғл таъмин намудан мутамарказии зеҳниро ба вуҷуд меорад ва онҳоро бештар амалгаро мекунад, онҳо ба кори барои худашон ва барои ҷамъият фоиданок ҷалб мешаванд. Дар ин самт, рушд ва оммавӣ гардонидани шоҳмот низ муҳим аст. Аз як тараф ин навъи дар ҷаҳон машҳури варзиш чун навъи қадимии бозиҳои миллии мо таблиғ ва ривоҷ мебинад, аз тарафи дигар зеҳнияти ҷавонону наврасон қавӣ мегардад, барои ташаккули қишри зиёии техникӣ низ мусоидат карда мешавад ва аз ҳама муҳим, ин кор барои ташаккули имиҷи мусбати Тоҷикистон дар сатҳи минтақа ва ҷаҳон таъсири нек мерасонад. Маҳз ба ҳамин хотир Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон моҳи августи соли 2017 зимни суханрониашон ба муносибати Рӯзи дониш дар бораи зарурияти дар муассисаҳои таълимӣ ҷорӣ намудани дарси шоҳмот ва ба ин хотир таҳия ва чоп кардани китобу дастурҳои таълимӣ таъкид намуда буданд. Баъди он Вазорати маориф ва илми Ҷумҳурии Тоҷикистон барномаи таълимӣ ва китоби дарсии «Асосҳои шатранҷ»-ро ба чоп расонд ва дар мактабҳо дарси шоҳмат роҳандозӣ карда шуд.
Ҷамшед Абдуқаюмзода дар анҷоми суханронии худ, изҳори умедворӣ намуд, ки чорабинии пуршукуҳи имрӯза барои дарёфти «Ҷоми Пешвои миллат» дар ташаккули неруйи зеҳнӣ ва малакаи варзишии ҷавонон мусоидат намуда, дар ояндаи наздик сафи дӯстдорони чунин намуди варзиш дар шаҳр зиёд хоҳад шуд.
Сипас, шоҳмотбозони синну соли гуногун байни худ барои шоҳмот барои дарёфти “Ҷоми Пешвои миллат” ба мусобиқа оғоз намуданд.
Интизор меравад, ки даври шаҳрии озмун мазкур моҳи августи соли ҷорӣ натиҷагирӣ карда хоҳад шуд.
Дафтари матбуоти
Раиси шаҳри Хуҷанд
