13 Май 2019
Дар толори маҷлисҳои Мақомоти иҷроияи ҳокимияти давлатии шаҳри Хуҷанд мулоқоти кормандони Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд Шоира Мутаваллиён ва Васлибек Назриён бо намояндагони бахшу шӯъбаҳо ва раёсатҳои мақомоти иҷроия, маорифу тандурустӣ, кумитаҳои маҳаллаҳо, ҷавонон, занон ва фаъолони шаҳр доир гардид.
Мулоқотро муовини Раиси шаҳр Ҷамшед Абдуқаюмзода ифтитоҳ бахшида, таъкид сохт, ки коррупсия яке аз зуҳуроти хавфноки ҷомеа буда, дар миқёси ҷаҳон ҳамчун ҷинояти вазнин ва яке аз унсурҳои таҳдидкунанда ба амнияти миллӣ, халалдоркунандаи рушди босуботи иҷтимоию иқтисодии кишвар эътироф гардидааст. Аз ин лиҳоз, муборизаи дастаҷамъона алайҳи ин зуҳуроти ҷомеа кори ҳамагон буда, пешгирии он вазифаи муҳим шумурда мешавад.
Сипас, намояндагони Раёсати Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилояти Суғд Шоира Мутаваллиён ва Васлибек Назриён оид ба фаъолияти раёсати Агентӣ дар чаҳор моҳи соли ҷорӣ маълумот дода, зикр карданд, ки дар ин фурсат баҳри паст кардани зуҳуроти коррупсионӣ дар кишвар 10 маротиба вохӯриву мулоқот дар литсейҳову донишгоҳҳо, марказҳои шуғли аҳоливу марказҳои саломатӣ ва муассисаҳои муорифу тиббӣ баргузор намуданд.
Ҳини маърӯзаи хеш оид ба қонуну барномаҳо оид ба пасти кардани ҷиноятҳои коррупсионӣ ҳарф зада, таъкид намуданд, ки барои пешгирӣ аз ҳама ҷинояту ҷинояткорӣ ва мубориза ба коррупсия санаи 31 октябри соли 2003 Конвенсияи Созмони Милали Муттаҳид зидди коррупсия қабул шуда, санаи 9 декабри соли 2003 дар конфронси сиёсӣ зиёда аз 100 давлати дунё ба Конвенсияи мазкур имзои худро гузошт. Ҷумҳурии Тоҷикистон низ ҳамчун узви комилҳуқуқи ҷомеаи ҷаҳонӣ дар қатори дигар давлатҳо санаи 25 сентябри соли 2006 ба Конвенсияи мазкур имзо гузошта, он ба низоми ҳуқуқии кишвар ворид карда шуд. Бо иқдоми сиёсии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон бо мақсади мубориза бар зидди ҳуқуқвайронкуниҳо ва ҷиноятҳои хусусияти коррупсионидошта, таъмини шаффофият ва такмили фаъолияти назоратӣ 10 январи соли 2007 Агентии назорати давлатии молиявӣ ва мубориза бо коррупсияи Ҷумҳурии Тоҷикистон ҳамчун мақоми махсусгардонидшуда таъсис дода шуд. Дар ин ҷода баҳри банақшагирии фаъолияти давлат дар самти муқовимат ба коррупсия бо қарори Ҳукумати Ҷумҳурии Тоҷикистон аз 30 августи соли 2013, таҳти №1504 “Стратегияи муқовимат ба коррупсия дар Ҷумҳурии Тоҷикистон барои солҳои 2013-2020” қабул гардид. Баҳри амалӣ гаштани мақсаду мароми Барномаҳои мазкур Агентӣ аз тамоми имкониятҳои мавҷуда истифода бурда, ҷиҳати татбиқи нақшаи чорабиниҳои онҳо дар ҳамбастагӣ бо вазорату идораҳо чораҳои таъхирнопазир ва муассирро андешида истодааст.
Дар фарҷоми мулоқот аҳли нишаст ба саволҳои пайдошудаи худ аз намояндагони ваколатдор посух гирифтанд.
Дафтари матбуоти
Раиси шаҳри Хуҷанд