08 Май 2019
Субҳи имрӯз дар назди муҷассамаи ёдгории шаҳидони Ҷанги бузурги Ватании шаҳри Хуҷанд бахшида ба таҷлили 74 умин солгарди Рӯзи Ғалаба дар Ҷанги бузурги Ватании солҳои 1941-1945 чорабинии тантанавӣ баргузор гардид.
Баъди садо додани Суруди миллӣ, Раиси вилояти Суғд Раҷаббой Аҳмадзода чорабиниро расман ифтитоҳ намуда, ҳозиринро бо фарорасии 74 умин солгарди Рӯзи Ғалаба дар Ҷанги бузурги Ватанӣ табрику таҳният гуфт. Таъкид шуд, ки қаҳрамониву шуҷоати фарзандони матиниродаи мо дар ин муҳорибаҳо бемисл буда, дар радифи садҳо халқияту миллатҳо баҳри мубориза бо душманони ғаддор ҷоннисорӣ кардаанд. Ин нукта дар яке аз суханрониҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид гардидааст: «Мо имрӯз ва минбаъд низ бо ифтихору сарфарозӣ иброз медорем, ки дар таъмини Fалабаи таърихӣ дар баробари фарзандони дигар ҷумҳуриҳои собиқ Иттиҳоди Шӯравӣ ва халқҳое, ки бар зидди истибдоди фашистӣ мубориза бурдаанд, ҷавонмардони бонангу номуси Тоҷикистон низ саҳми арзишманд гузоштаанд». Шуҷоату диловарӣ ва истодагарии фарзандони ватандӯсту ватанхоҳи мо дар солҳои Ҷанги Бузурги Ватанӣ намунаи олии муҳаббат ба Ватан ва дарси ибрати ҷавонмардӣ барои наслҳои имрӯзу фардои кишвар аст. Аз вилояти Суғд дар ин набардҳои хунин 76 ҳазор нафар иштирок кардаанд. Қаҳрамонӣ ва ҷоннисориҳои онҳо барои имрӯзиён ҳам дарси шуҷоату мардонагӣ аст. Ин фидоиёни роҳи озодии Ватан имрӯз ҷавонони моро ба ҳифзи сарзамин, хизмати содиқона дар сафи Қувваҳои Мусаллаҳи Ҷумҳурии Тоҷикистон ҳидоят менамояд.
Раҷаббой Аҳмадзода гуфт, ки гиромидошти Рӯзи Fалаба, чун нишони эҳтиром ба далериву ҷоннисориҳои фарзандони кишварҳои мухталиф мебошад, ки оташи ҷанги даҳшатнокро хомӯш ва озодии мардумони сайёраро таъмин карданд. Хотираи неки онҳо ҳамеша дар дилу дидаи мо абадӣ маскан гирифтааст. Давлату Ҳукумати Ҷумҳурии Тоҷикистон ва Мақомоти иҷроияи ҳокимияти давлатии вилоят ба иштирокчиёни Ҷанги Бузурги Ватанӣ ва собиқадорони меҳнат таваҷҷуҳи пайваста зоҳир менамоянд, зеро онҳо намунаи устуворӣ, мардонагӣ, ҷасорат ҳастанд.
Сипас, Раиси вилояти Суғд Раҷаббой Аҳмадзода, Раиси шаҳри Хуҷанд Маъруф Муҳаммадзода ва ҳайати ҳамроҳонашон бо мақсади арҷгузорӣ ба шаҳидони ҶБВ бар пояи муҷассамаи ёдгории шаҳидони Ҷанги бузурги Ватании шаҳри Хуҷанд гулчанбар гузоштанд. Иштирокдорони чорабинии тантанавӣ низ бо гузоштани гулчанбарҳо хотираи шаҳидони ҶБВ шод намуданд.
Гузашти низомии аскарону афсарон ба чорабинӣ ҳусни анҷом бахшид.
Дафтари матбуоти
Раиси шаҳри Хуҷанд
