01 Май 2019
Дар толори Мақомоти иҷроияи ҳокимияти давлатии шаҳри Хуҷанд ҷаласаи нахустини Шӯрои ҳамаҳангсозии мақомоти ҳифзи ҳуқуқи шаҳр дар соли равон баргузор гардид.
Раиси шаҳри Хуҷанд Маъруф Муҳаммадзода ҷаласаро оғоз намуда, иттилоъ дод, ки дар ҷаласаи Шӯрои ҳамоҳангсозии мақомоти ҳифзи ҳуқуқи шаҳр аъзоёни Шӯрои ҳамоҳангсозии мақомоти ҳифзи ҳуқуқи шаҳр, муовини аввали Раиси шаҳри Хуҷанд, муовинони Раиси шаҳр, роҳбари дастгоҳи Раиси шаҳр, раиси суди шаҳри Хуҷанд, роҳбарони сохторҳои Мақомоти иҷроияи ҳокимияти давлатии шаҳр, раисони кумитаи маҳаллаҳо, ходимони дин, нозирони минтақавӣ ва дигар шахсони масъул ҳузур доранд.
Сипас, прокурори шаҳри Хуҷанд Авазҷон Назарзода роҷеъ ба вазъи иҷрои қонунгузории замин ва шаҳрсозию меъморӣ баромади муфассал намуд.
Иттилоъ дода шуд, ки тайи солҳои охир симои шаҳри бостонии Хуҷанд ба куллӣ дигар шудааст, ки дар он саҳми роҳбарияти шаҳр ва фаъолону сокинон назаррас аст. Ҳамзамон аз ҷониби мақомоти ҳифзи ҳуқуқи шаҳр дар самти иҷрои қонунгузории замин корҳои зиёд ба анҷом расонида шудааст.
Авазҷон Назарзода таъкид дошт, ки новобаста аз чораҳои андешида ҳангоми ҷудо ва вобаста намудани қитъаҳои замин, додани иҷозати сохтмон дар фаъолияти шуъбаҳои дахлдор бархе камбудиҳо ҷой дорад. Яке аз сабабҳои ҷой доштани қонунвайронкуниҳо дар соҳаи заминистифодабарӣ паст будани савияи дониши ҳуқуқии шаҳрвандон ва шахсони масъули мақомотҳои дахлдор мебошад. Дар фаъолияти комиссияи давлатии қабул, ҳуқуқ ва ўҳдадориҳои онҳо низ камбудиҳо ба мушоҳида мерасад.
Дар анҷоми маърӯзаи худ прокурори шаҳри Хуҷанд Авазҷон Назарзода аз масъулини дахлдор даъват ба амал овард, ки дар самти риояи қонунгузории замин ва шаҳрсозию меъморӣ масъулияти ҷиддӣ пеша намоянд. Ҳангоми додани хулоса барои ҷудо карда қитъаи замин ё дигар намудани мақсади истифодаи қитъаи замин ва бино талаботи нақшаи генералии шаҳр ба назар гирифта шавад.
Сипас, дар музокираи масъалаи мазкур Аюб Рахматзода, муовини Раиси шаҳри Хуҷанд, Тоҳир Толибзода, раиси кумитаи идораи замини шаҳр ва Акмал Ғайбуллозода, иҷрокунандаи вазифаи сармеъмори шаҳр баромад намуданд.
Дар ҷараёни ҷаласаи Шӯрои ҳамоҳангсозии мақомоти ҳифзи ҳуқуқи шаҳр доир ба фаъолияти аъзои комиссияҳои ҷамъиятӣ оид ба тақсимоти замини наздиҳавлигӣ, раисони кумитаи маҳаллаҳо, нотариусҳо, сохтмончиён, соҳибкорони биносоз, хадамоти назорат дар соҳаи сохтмон, нозирони минтақавии милитсия ва ғайраҳо мубодилаи афкор сурат гирифта, масъулини дахлдор ҷиҳати иҷрои қонунгузории замин вазифагузорӣ гардиданд, ки бахусус назоратро аз вақти оғози сохтмон ба роҳ монанд ва пеши роҳи ҳолатҳои худсарона, ишғоли қитъаи замин ва сохтмони худсарона гирифта шавад.
Дар анҷоми ҷаласаи Шӯрои ҳамоҳангсозии мақомоти ҳифзи ҳуқуқи шаҳр Раиси шаҳри Хуҷанд Маъруф Муҳаммадзода баромад намуда, аз ҷумла таъкид дошт, ки маҳз ба шарофати сиёсати бунёдкоронаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи сохтмон ва шаҳрсозӣ дар мамлакат, аз ҷумла дар шаҳри Хуҷанд пеш рафта истодааст. Мақомоти иҷроияи Ҳокимияти давлатии шаҳри Хуҷанд дар партави дастуру супоришҳое, ки аз Паёми Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ бармеоянд, ҷиҳати пешгирии амалҳои ғайриқонунӣ дар самти истифодаи самараноку оқилонаи замин, пурзӯр намудани назорати давлатии истифода ва ҳифзи замин ва такмил додани усулҳои идоракунии захираҳои замин тадбирҳои зарурӣ меандешад. Риояи талаботи қонунгузории шаҳрсозӣ ва замин яке аз самтҳои фаъолияти мақомоти иҷроияи ҳокимияти давлатии шаҳр мебошад. Бинобар он масъулини кумитаи идораи замин вазифадор карда шуданд, ки мунтазам санҷишҳо гузаронида, доир ба ҳолатҳои ғайриқонунӣ ишғол намудани қитъаҳои замин, хариду фурўши замин ва сохтмони худсарона ба унвони Раиси шаҳр ва прокурори шаҳр ахбороти хаттӣ пешниҳод намоянд.
Маъруф Муҳаммадзода бо истифода аз ҳузури аъзоёни Шӯрои ҳамоҳангсозии мақомоти ҳифзи ҳуқуқи шаҳр аз тамоми сохторони марбут ба назорат ва истифодабарии замин, бахусус кумитаи идораи замини шаҳр, шуъбаи меъморӣ ва шаҳрсозӣ даъват ба амал овард, ки фаъолиятро ҷиҳати пешгирии амалҳои ғайриқонунӣ дар самти истифодаи самараноку оқилонаи замин ва назорати давлатии истифода ва ҳифзи замин пурзӯр намоянд.
Дафтари матбуоти
Раиси шаҳри Хуҷанд
