Хуҷанд. 14 июл. Рӯзи гузашта дар интернет – толори мақомоти иҷроияи ҳокимияти давлатии шаҳри Хуҷанд нишасти матбуотии навбатии Раиси шаҳр Содиқҷон Мирхолиқов баргузор гардид.

Хабарнигорони воситаҳои ахбори умуми шаҳрӣ, вилоятӣ, ҷумҳуриявӣ, давлатию ғайридавлатӣ, расонаҳои хабарии хориҷӣ, соҳавӣ, оҷонсиҳои иттилоотӣ, ки дар нишасти матбуотӣ иштирок доштанд, ба саволҳои худ доир ба масъалаҳои мубрами рӯз, натиҷаҳои истеҳсолии  корхонаҳо, рушди  иқтисодию иҷтимоии шаҳр дар нимсолаи аввали соли 2010-ум аз Раиси шаҳр ҷавобҳои саҳеҳ гирифтанд.

Роҳбари маркази иттилоот ва таҳлили Дастгоҳи Раиси вилояти Суғд профессор Раънохон Бобоҷонова, ки бо намояндагӣ аз мақомоти иҷроияи ҳокимияти давлатии вилоят дар нишасти матбуотӣ ҳузур дошт, аз намояндагони расонаҳои хабарӣ даъват ба амал овард, то ба хотири инъикоси воқеии ҳамаи паҳлуҳои ҳаёти ҷамъиятиву сиёсӣ, иҷтимоиву иқтисодӣ ва фарҳангиву маънавӣ ҳамкориро бо мақомоти маҳаллии ҳокимияти давлатӣ вусъат бахшанд.