18 Июль 2013
Корро бояд ҷоннок намуд
Пас аз анҷоми Иҷлосияи чордаҳуми Маҷлиси вакилони халқи шаҳри Хуҷанд, даъвати чорум дар толори Маркази фарҳанг маҷлиси фаъолони шаҳр баргузор гардид.
Раиси шаҳри Хуҷанд Раҷаббой Каримов ба маҷлис ҳусни оғоз бахшида, зикр намуд, ки дар рӯзномаи он танҳо як масъала, оид ба натиҷаҳои рушди иҷтимоию иқтисодии шаҳри Хуҷанд дар нимсолаи аввали соли 2013-ум гузошта шуда, мавриди гуфтушунид қарор мегирад.
Доир ба вазъи иҷтимоию иқтисодии шаҳр дар моҳҳои январ-июни соли равон муовини Раиси шаҳри Хуҷанд Маҳмадӣ Давлатов гузориш дод. Мавсуф аз ҷумла қайд кард, ки дар моҳҳои январ-июни соли 2013-ум корхонаҳои саноатӣ ба маблағи 190 миллиону 525 ҳазор сомонӣ маҳсулот истеҳсол карданд, ки ин нисбат ба ҳамин давраи соли 2012-ум 12,9 фоиз зиёд аст.
Аз 85 корхонаи саноатии ҳисоботдиҳанда 68 корхона (80 фоиз) нисбат ба сатҳи соли гузашта бештар маҳсулот истеҳсол карданд. Аз ҷумла, истеҳсоли маҳсулот дар ҶДММ КМ «Силкоат Бойя» - 3,7 баробар, ҶДММ «7 ганҷ» -2,6 баробар, ҶДММ «Неку Хуҷанд» - 2,2 баробар ва ҶДММ «Сатн» 188,8 фоиз зиёд шуд.
16 корхона (18,8 фоиз) аз дараҷаи соли гузашта кам маҳсулот истеҳсол намудаанд. Аз он ҷумла, КВДИ матбааҳои вилояти Суғд - 64,9 фоиз, ҶДММ «Сарэй» - 54,8 фоиз, ҶДММ «ММК» - 54,7 фоиз, ҶСП «Сомон Суғд» - 45 фоиз, ҶДММ «Андеша» - 32 фоиз, ҶДММ КМ «Хуҷанд – Пакиҷинг»-16,9 фоиз, корхонаи нобиноён – 12,9 фоиз ва ҶДММ КМ «ВТ Силк» – 3,5 фоиз.
Дар ин давра 1 корхона (1,2 фоиз) кор накард: ҶС «Сирандуд».
Ҳаҷми маҳсулоти саноатии истеҳсолкардаи шаҳри Хуҷанд нисбат ба ҳаҷми маҳсулоти саноати истеҳсолкардаи вилояти Суғд 10,5 фоизро ташкил медиҳад.
Сармоягузории ба сохтмони асосӣ, гуфт дар идомаи баромадаш Маҳмадӣ Давлатов,- аз ҳисоби ҳамаи манбаъҳои сармоягузорӣ ба маблағи 91 миллиону 688 ҳазор сомонӣ истифода карда шудааст, ки нисбат ба сатҳи январ-июни соли 2012-ум 37 миллиону 837 ҳазор сомонӣ зиёд аст.
Ҳаҷми асосии корҳои иҷрошуда аз ҳисоби маблағи буҷетӣ ба 66 миллиону 271 ҳазор сомонӣ расид, ки аз он аз тарафи МКС-и Мақомоти иҷроияи ҳокимияти давлатии шаҳри Хуҷанд ба андозаи 3 миллиону 758 ҳазор сомонӣ, Идораи сохтмони вилояти Суғд 52 миллиону 109 ҳазор сомонӣ, Идораи сохтмони шаҳри Хуҷанд 2 миллиону 28 ҳазор сомонӣ мебошад.
Дар нимсолаи аввали соли 2013 бо нақлиёти автомобилии вазорату идораҳо, корхонаву ташкилотҳои ҳамаи шаклҳои моликият 800 ҳазор тонна бор кашонида шуд, ки ин нисбат ба ҳамин давраи соли 2012-ум 15,5 фоиз зиёд мебошад.
Бахусус, бо нақлиёти автобус 9,5 ҳазор нафар мусофир кашонида шудааст, ки нисбат ба ҳамин давраи соли гузашта 2,1 фоиз кам аст.
Мувофиқи маълумоти Раёсати молияи Мақомоти иҷроияи ҳокимияти давлатии шаҳри Хуҷанд қисми даромади буҷети умумӣ ба 1 июли соли 2013 ба андозаи 107,6 фоизи нақша иҷро гардида, 89 миллиону 881 ҳазор сомониро ташкил кард.
Аз 11 намуди буҷети умумии дар нақша пешбинишуда 2 намуд иҷро нашуд: аксизҳо - 165,9 ҳазор сомонӣ ва андоз аз истифодабарандагони захираҳои табиӣ - 211,4 ҳазор сомонӣ.
Қисми даромади буҷети маҳаллӣ ба андозаи 109,4 фоизи нақша иҷро гардида, 35 миллиону 847 ҳазор сомониро ташкил кард.
Иҷроиши қисми хароҷоти буҷети маҳаллӣ дар ин давра 30 миллиону 387 ҳазор сомонӣ ё худ 104,5 фоиз нисбат ба нақша иҷро шуд.
М.Давлатов дар идомаи суханаш зикр намуд, ки дар моҳҳои январ-июни соли 2013 мақомоти сабти ҳолати шаҳрвандӣ (САҲШ)-и дар шаҳри Хуҷанд 1925 нафар кўдаки навзод ва 564 нафар фавт, аз он ҷумла 120 нафар кўдакони то 1 сола фавтидаро ба қайд гирифтааст.
Шумораи никоҳҳои бақайдгирифташуда дар ин муддат 694 ададро ташкил кард, ки ин нисбат ба ҳамин давраи соли гузашта 1,6 фоиз ё ба 11 адад кам ба қайд гирифта шудааст.
Дар ин давра шумораи талоқҳои ҳуҷҷатишуда 160 ададро ташкил дода, нисбат ба ҳамин давраи соли гузашта ба 16,6 фоиз ё ба 32 адад кам ба қайд гирифта шудааст.
Дар моҳҳои январ-июни соли 2013 дар шаҳри Хуҷанд 405 ҷиноят ба қайд гирифта шуд.
Ҳодисаи дуздӣ 111 адад ба қайд гирифта шуд, ки нисбат ба ҳамин давраи соли гузашта 16,6 фоиз кам мебошад. Дуздии амволи хона 15 адад, ки нисбат ба соли гузашта 23 адад ё 60,5 фоиз кам шуд.
Баъд аз шунидани ҳисобот, Раиси шаҳри Хуҷанд Раҷаббой Каримов ашхоси масъулро мавриди бозпурсӣ қарор дод. Доир ба натиҷаи фаъолияти соҳоти хеш дар нимсолаи аввали соли 2013-ум назди ҳозирин мудири шӯъбаи маҳаллаҳои МИҲД-и шаҳр Сайфуллохон Ҳабибуллоев, мудири бахши кор бо занон ва оила
Муҳайёхон Дадобоева, мудири шӯъбаи маориф Акрам Аслонов, мудири шӯъбаи нақлиёт ва алоқа Fафурҷон Дадоҷонов, раиси Кумитаи заминсозии шаҳр Хӯҷабой Ҳайдаров, мудири бахши нигаҳдории тандурустӣ Абдумуталим Каримов ва Сардори КВДК «Сарраёсати ободонӣ ва хоҷагии манзилию коммуналии шаҳр» Абдурасул Каримов ҳисобот дода, аз ҷониби Раиси шаҳр муваззаф гардиданд, ки дар мӯҳлатҳои кӯтоҳтарин камбудиву норасиҳоро бартараф намоянд.
Сипас муовини Раиси вилояти Суғд Мубинҷон Қаюмов баромад карда, оид ба дастовардҳои назаррас дар кулли соҳаҳои хоҷагии халқи шаҳр, саҳми шаҳрвандон дар корҳои ободониву созандагӣ ибрози ақида намуд. Ҳамзамон, баҳри рафъи камбудиҳо ба масъулин супоришҳои мушаххас дод.
Дар фарҷом Раиси шаҳри Хуҷанд Раҷаббой Каримов сухан карда, вазифаву супоришҳоро барои нимсолаи дуюми соли равон мушаххас кард ва роҳбарону сарварони шӯъбаву бахшҳо ва корхонаву муассисаҳоро ба меҳнати созандаву софдилона баҳри нафъи мардум ва Ватани азиз даъват намуд.
